បាត់ដំបង៖ ពលករខ្មែរជិត២ពាន់នាក់ បានវិលត្រឡប់មកពីប្រទេសថៃ តាមច្រកព្រំដែនទាំង៥ ក្នុងភូមិសាស្រ្តនៃខេត្តបាត់ដំបង ។
នេះបើតាមលោក សឿម ប៊ុនរិទ្ធិ អភិបាលរងខេត្ត និងជាអ្នកនាំពាក្យរដ្ឋបាលខេត្តបាត់ដំបង បានផ្តល់ព័ត៌មានមកក្រុមការងារប្រចាំខេត្តបាត់ដំបង តាមប្រព័ន្ធ Telegram នារាត្រីថ្ងៃទី១៦ ខែមិថុនា ឆ្នាំ២០២៥ ។
លោក សឿម ប៊ុនរិទ្ធិ បានបញ្ជាក់បន្ថែមទៀតថា ជាបន្តបន្ទាប់ប្រជាពលរដ្ឋ និងពលករខ្មែរបានធ្វើដំណើរចូលតាមច្រកទ្វារព្រំដែនទាំង០៥ ក្នុងភូមិសាស្ត្រខេត្តបាត់ដំបង សរុបទាំងអស់ចំនួន ១.៦៩៩នាក់ ស្រីចំនួន៧៨៧នាក់ ក្នុងនោះមានពលករចូលចំនួន ១.០៨៩នាក់ ស្រីចំនួន៥១៧នាក់ និងធ្វើដំណើរចេញសរុបចំនួន ៩១៣នាក់ ស្រីចំនួន៤០២នាក់ ក្នុងនោះមានពលករចេញចំនួន ៥៣៤នាក់ ស្រីចំនួន២៥៥នាក់ ។
លោកអ្នកនាំពាក្យរដ្ឋបាលខេត្តបាត់ដំបង បានបន្តទៀតថា
ច្រកទ្វារព្រំដែនអន្តរជាតិដូង ក្នុងស្រុកកំរៀង បានបិទពុំដំណើរការទេ ប៉ុន្តែបានបើកច្រកថ្មើរជើងសម្រាប់ពលករវិលត្រឡប់ចូលប្រទេសវិញ ចំពោះច្រកទ្វារព្រំដែនចំនួន០៤ទៀត បានបើកដំណើរការជាធម្មតា និងពុំមានស្ថានភាពអ្វីគួរឱ្យកត់សំគាល់ឡើយ ហើយនៅច្រកទ្វារព្រំដែនអន្តរជាតិដូង មានប្រតិភូក្រសួងការងារ និងបណ្តុះបណ្តាលវិជ្ជាជីវៈ បានចុះពិនិត្យទីតាំងសម្រាប់រៀបចំត្រៀមទទួលពលករវិលត្រឡប់ពីថៃផងដែរ ។
លោក សឿម ប៊ុនរិទ្ធិ បានឱ្យដឹងទៀតថា សម្រាប់ថ្ងៃទី១៦ ខែមិថុនា ឆ្នាំ២០២៥ មានរថយន្តកម្ពុជា បានដឹកទំនិញចូលប្រទេសថៃ ចំនួន១៥គ្រឿង និងចូលទៅដឹកទំនិញចេញពីប្រទេសថៃចំនួន៦០គ្រឿង ដោយឡែករថយន្តថៃ បានដឹកទំនិញចូលមកប្រទេសកម្ពុជា ចំនួន៣៦គ្រឿង និងចូលមកដឹកកសិផលក្នុងប្រទេសកម្ពុជា ចំនួន៤២គ្រឿង ក្នុងនោះច្រកតំបន់ព្រំដែនអូរអន្លក់ មានរថយន្ត ចំនួន៣គ្រឿង និងច្រកតំបន់ព្រំដែនអូររំដួល មានរថយន្ត ចំនួន២៦គ្រឿង ដែលដឹកផ្លែឈើពីថៃ ចូលមកប្រទេសកម្ពុជា ។
លោកអភិបាលរងខេត្តបាត់ដំបង បានបង្ហាញដែរថា ទំនិញនាំចូលពីប្រទេសថៃ រួមមាន គ្រឿងសំណង់ គ្រឿងឧបភោគ បរិភោគ ចំណីសត្វ អីវ៉ាន់ចាប់ហួយ អីវ៉ាន់បញ្ញើ និងផ្លែឈើ ដោយឡែកទំនិញនាំចេញទៅប្រទេសថៃរួមមាន កសិផល និងអីវ៉ាន់បញ្ញើ ៕
ដោយ ៖ គួយ គឹមស៊ន
